Ko te Rarua te tuawaru o Mahuru
Hola mi amigos.
Tena koutou katoa e noho atu ana i te kainga. I te taenga mai ki koneki, ki Santiago, kaore i tino whai wa ki te tuhituhi kupu, te mea hoki i wahi ke oku whakaaro, ara kaore au i mohio ko wai a runga, ko wai a raro?
Heoi, toru ra nei matau ko Matatia ko Te Wehi, ko Tanawhea, ko Te Miringa, Ko Okeroa, ko Te Amorangi me te hunga pouaka whakaata (Hinurewa Poutu, Mahanga Pihama, Pete Lee) e takahi ana i te mata o te whenua nei. Kotahi te po i Buenos Aires, e rua ki koneki. Tera pea me hoki atu ki te timatatanga o tenei o nga haerenga whakahirahira.
I mua i te wehenga atu i Tamaki-makaurau ka tutakitaki mai nga whanau (Wright, Rikirangi-Thomas, Whau Whau, Sherman, Douglas, Brell). Na Piki Thomas nga kupu poroporoaki i tuku mai . Ka takina te karakia e Rawiri Wright, katahi matau ka awhiawhi, na, ka huri te tira wehe ki te putanga hai arahi i a matau ki te ara e eke atu ai ki runga i te wakarererangi.
Tekau ma rua haora i runga i te wakarererangi - katahi te rere nui, te rere roa!
Ka ruturutu pai te wakarererangi i te taunga ki te papawhenua ki Buenos Aires.
Ka hopukina he teekehi ki to matau hotera i waenga pu i te taone nui nei, te tere hoki! Ano nei kare kau he ture! Kua tata to te ra i te taenga atu ki reira ana i muri mai i te whakarite ruma me te kai ka puta ki waho ki te hikoi haere i nga tiriti. Ka tu nga akonga ki te kuhu noa atu ki tena, ki tena o nga toa ki te hoko i nga momo tiakarete. I te mutunga, kaore matau i haere tawhiti atu i te hotera. Ka pau te rua haora kua hoki ke matau ki te hotera ki te whai moe.
Subscribe to:
Post Comments (Atom)
No comments:
Post a Comment